語音導賞資料庫
隨時隨地探索語音導賞資料庫，收聽策展人、創作人及受邀嘉賓的介紹，或了解相關作品或建築在視覺上的特徵。
建築導賞
口述影像
草間彌生：一九四五年至今
8002 (廣東話)
8002 (廣東話)
3:29
漂泊者
2015–2016
Tiffany Chung：
Hi，我係Tiffany Chung，係一位美藉越南裔視覺藝術家，我依家住喺德克薩斯州嘅休士頓。
宋氏春：
大家好，我係宋氏春，我嚟自越南，後來坐船嚟到香港，嚴格嚟講，我好多年前係一名船民。
旁述：
Tiffany係創作呢件大型作品《漂泊者》嘅藝術家。呢個作品探討越戰結束之後，越南難民漂洋過海嚟到香港嘅困境，同時挑戰我哋對現代人口遷徙嘅固有睇法。多年嚟，香港對好多「越南船民」嚟講，都係「第一收容港」。但係，政府最終宣佈喺1988年6月16日之後唔再為佢哋提供庇護。
宋氏春依家係一名人權律師，曾經亦係一名難民。佢同家人就係差少少，錯過咗抵港嘅最後限期，從此徹底改變咗佢哋嘅生活。
宋氏春 ：
好唔好彩，我哋喺最後限期之後兩個月先嚟到香港，我哋隻船俾人攔截，然後被拘留，等候審查。由1988年到1996年底，我被拘留喺唔同嘅難民營，所有都係禁閉式。所以，我十歲開始，到十八歲左右，總共超過八年都喺禁閉營渡過。
旁述：
呢件作品做咗好多檔案研究，亦用咗唔同嘅媒介去呈現，但Tiffany好想我哋注意嘅，係穿插喺作品中、非常有力量嘅水彩畫。
TIFFANY CHUNG：
呢啲水彩畫，係我用多年嚟收集嘅真實檔案圖片去創作嘅，我委託咗喺越南西貢嘅年輕畫家將呢啲圖片重新畫成水彩畫。咁樣做，係因為呢段歷史喺越南嘅官方歷史中已經被抹去，被遺忘喇。冇人會再喺公共場合公開討論呢件事，學校亦都唔會教。所以，我試圖令年輕嘅越南人重新認識呢段歷史。
宋氏春：
當我睇到Tiffany嘅圖片同繪畫嗰陣，我已經眼濕濕。呢啲圖畫重現咗我哋以前嘅生活，令我諗起難民營裏面嘅環境係幾咁惡劣。呢個作品真係好重要，佢證明咗我哋曾經係咁樣生活，亦提醒大家一個事實，就係呢啲事曾經發生過。 呢啲畫所描繪嘅同發生過喺我哋身上嘅事係無分別。
旁述：
Tiffany反思呢個作品最重要嘅訊息，就係點樣令難民同移民呢啲議題，响今日引起更廣泛嘅討論。
TIFFANY CHUNG：
我諗某程度上，大部分人會認為呢啲人係被迫遣返嘅受害者。但另一方面，你又可以將佢哋睇成為真正掌握自己命運嘅人，佢哋冇認命，亦冇被其他人左右佢哋嘅人生。
我哋希望觀眾可以睇到一樣嘢，難民唔只係受害者，佢哋嘅旅程比我哋想像嘅更加勇敢。面對羈留營嘅可怕生活同埋強迫遣返，佢哋都作出反抗：證明佢哋嘅政治能動性可以重塑當下難民嘅論述。
本網站使用「Cookies」為你提供最好的網站體驗。
了解更多載入中