M+ no longer supports this web browser.
M+ 不再支持此網頁瀏覽器。
M+ 不再支持此网页浏览器。
旁述：
呢件作品嘅名稱係《Region No. 43701–No.43900》，係宮島達男喺1998年創作嘅裝置作品，物料包括LED燈、鋁板同電路。作品裝設喺牆上，整體高約2米，長約8.5米。
作品係由二百組長方形計數器組成，佢哋以打直十行、打橫二十列咁整齊排列喺一面長方形黑色鋁板度。每組計數器嘅表面，中間嘅位置都係LED燈，顯示阿拉伯數字1至9。呢啲數字大部分着紅色燈，只有少部分係着綠色燈。數字不斷轉換，有快有慢。而數字嘅上方同下方，可以見到控制住數字跳動嘅電路板。
展示空間幾乎全黑。離遠睇呢件作品，只係見到一組組着住全紅色或者全綠色燈嘅數字。綠色數字喺唔同位置出現，而佢哋散發嘅綠色燈光，睇起嚟就好似喺一片紅色燈海之中，形成幾條綠色斜行。只要仔細咁睇呢件作品嘅每一條直行，就會發現綠色數字嘅出現係有規律嘅：每打直數六組紅色數字，就會出現一組綠色數字。而喺作品下方嘅地面，反映住LED燈光嘅倒影，睇起嚟，就好似一道道火紅嘅光向下延伸。
靠近睇呢件作品，會見到每組計數器都有二十個位置可以顯示數字。呢啲數字會喺唔同時間、以唔同速度不斷轉換，有時會完整咁顯示晒二十個數字，有時就只係顯示幾個數字。有啲數字係完整咁顯示晒成個字形，有啲就無咗一啲筆畫咁。
觀眾喺展區內可以自由走動，亦可以喺長凳坐低，喺暗黑之中觀賞二百組不斷跳動、循環不息嘅數字。
本網站使用「Cookies」為你提供最好的網站體驗。
隨時隨地探索語音導賞資料庫，收聽策展人、創作人及受邀嘉賓的介紹，或了解相關作品或建築在視覺上的特徵。
Explore the archived audio guide content at any time and place. Listen to curators, makers, and guest speakers or learn about the key visual elements of different objects and architectural features.
