M+ no longer supports this web browser.
M+ 不再支持此網頁瀏覽器。
M+ 不再支持此网页浏览器。
沃夫納格的餐具櫃
旁述：
呢件作品嘅名稱係《沃夫納格的餐具櫃》，係巴勃羅．畢加索喺1959至1960年間創作嘅油畫，高195厘米，長280厘米，約一道門咁高，三道門並排咁闊。
作品描繪一個光線明亮嘅房間，中間有一座黑色櫃，前方有一隻斑點狗，左右兩邊各有一個人形，而後方淺藍色嘅牆上有天藍色嘅長方形，似掛畫又似窗口。成個畫面色彩鮮明，有明顯嘅塗抹痕迹。除咗黑色櫃嘅外形同表面有較複雜嘅線條外，其他物件都描繪得有啲模糊同簡略，只能夠從描畫嘅輪廓中聯想到佢哋嘅形態。
個黑色櫃頂天立地，闊度佔咗畫面大約一半空間，櫃頂似有飛簷，櫃身左右唔對稱：左邊上方有一條螺旋狀嘅柱，似係個櫃嘅支撐部件；右邊就似有一個個唔同大細嘅間格。成個櫃都有灰白色同翠綠色嘅線條，似勾勒櫃身同櫃門嘅花紋，或者係放喺櫃中嘅餐具。
櫃嘅前方，有隻朝向右邊嘅斑點狗，睇唔到個頭，佢個身、四肢同尾巴都以白色線條勾勒，同佢身後嘅黑色櫃嘅顏色對比強烈，睇起嚟特別明亮。
黑色櫃嘅左方，有一個人形面向黑色櫃，身高只到櫃嘅一半，身體呈三角形，似着住綠色裙。佢圓碌碌嘅頭係灰色一片，無五官，有密集嘅筆觸描畫頭髮，髮型似冬菇形狀。呢個人雙腳微曲，向住櫃伸出一條彎彎嘅手臂，似係喺最左邊嘅一張凳企起身離開嘅一刻。
而黑色櫃嘅右方，有另一個人形，形態似一尊放喺高身啡色基座嘅半胸像，又似一個企喺度面向住黑色櫃嘅人。人形身高接近櫃頂，有黑色及肩長髮，面容不清，只有一片唔均勻嘅暗藍色。
本網站使用「Cookies」為你提供最好的網站體驗。
隨時隨地探索語音導賞資料庫，收聽策展人、創作人及受邀嘉賓的介紹，或了解相關作品或建築在視覺上的特徵。
Explore the archived audio guide content at any time and place. Listen to curators, makers, and guest speakers or learn about the key visual elements of different objects and architectural features.
